好好彩有朋友讓左一個先購名額畀我，咁我先可以 6 月 2 日率先入手 Alphafly NEXT%。雖然我仲有一對 Vaporfly 4% 同 Vaporfly NEXT%，基於 % 系列嘅破紀錄歷史，加上有我鍾意嘅顏色，我一早決定佢一出我就會買。

當晚一攞鞋後，簡單熱身完就馬上著佢來衝圈 10 個 400米 @3:00。咁我對呢對新鞋嘅第一感覺係點呢 ?

＃外型 
黑色配綠色好禁污糟，第一感覺係幪面超人 Kamen Rider?。鞋底並非一掌過，又加上 Air Zoom 氣墊，設計係新穎嘅。拎上手，對鞋咁大舊，但感覺一啲都唔重，比想像中輕。

圖 : Leroy Tsang

＃對跑手幫助 
一著上腳，已感到 Alphafly NEXT% 同  Vaporfly NEXT% 嘅回彈好明顯有唔同，係加強咗 ! 我本身有開打籃球，著住對鞋馬上有一種強烈想去入樽嘅衝動。之後落場衝圈，今次係疫情三個月以來第一次衝圈，我本身預期每圈應該會跑約1:29 至 1:31 左右，感覺上係用以前衝圈同樣嘅力量，但結果第一個圈 1:22 ? 。好明顯，對鞋嘅回彈性同佢本身幫到推進向前，令到比同樣嘅力，佢回饋返比你嘅力量係多咗。

之後成晚都係保持住以往衝圈嘅感覺，之後 9 個圈平均每圈約 1:26 至 1:27 左右。整體上，因為對鞋，成晚表現的確係有丁點改善。

咁心理上嘅幫助其實兩三句講完:
＃你著住對神鞋無理由畀自己跑得慢呀嘛
＃著住佢好大心理壓力跑得慢驚會被人笑
＃因為你著住佢你要盡力呀

以上係星期四晚嘅第一感覺雖然好好，到星期五晚就知道佢嘅缺點喇。

＃缺點
1. 小腿好明顯會比平時累好多，星期五晚我嘅小腿拿到實晒。同埋，%系列一貫都係無乜足弓承托，又唔換得鞋墊，到呢一代都係咁。扁平足跑手要留意返。

2. 鞋底踭邊緣有少少甩皮，我只係跑咗 4 公里，%系列出名唔耐用嘅問題，好似係呢對鞋上仲係未有明顯改善 ?  希望佢比上一付代好啲啦，我著上一代跑咗 130公里已經跑爆右邊鞋踭。

3. HKD 2299一對鞋，呢個價格真係好....貴 !!!!!!! 呢對鞋絕對唔會係慢跑鞋同跑山鞋，星期二買完，我肉赤到今日都心痛緊呀 !! （我儲咗好耐錢去買係一件事，但終於得到手又另一件事）如唔係特別鍾意，又唔係買來搏 PB 嘅話，係今年未有賽嘅情況下，真係唔使急住買。當然，到有賽先來買到時唔知買唔買到呀。

＃總結
即使我只係一個好普通嘅跑手，但呢對鞋好明顯係幫到自己突破 PB。如大家真係想用來搏命突破自己紀錄，又捨得畀二千幾銀買對鞋嘅話，唔使諗，就梗係買呢對啦。

但千其唔好係唔係同埋跑咩都著佢，我著一次衝圈，第二日小腿都好緊。如大家唔係每次都做足熱身同 cool down、拉筋嘅話，要小心整傷腳呀 !

而家我有 Alphafly NEXT% 做比賽鞋， 對 Vaporfly NEXT% 可以退落嚟，轉做平時計時用鞋啦。

文 / 圖 : Leroy Tsang
編輯 : 艾頓